ESB-merking dekkja
Gæðamerking ESB á dekkjum var innleidd hér á landi fyrir nokkrum árum og með henni eru dekk flokkuð eftir sparneytni,
hemlun í bleytu og ytri hávaða frá dekkjunum. Þessi merking hefur ekkert með stærðarmerkingar dekkja að gera en um dekkjastærðir má lesa hér.
Útskýringar á dekkjamerkingum ESB
Dekkjamerkingar ESB ná ekki yfir allar gerðir dekkja þótt líklegt sé að það breytist í framtíðinni. Í dag gilda reglurnar um öll dekk nema nagladekk, en þó er vert að taka fram að merkingar ESB ná ekki að mæla hæfni vetrardekkja og heilsársdekkja í snjó og hálku þar sem merkingarnar flokka aðeins eftir sparneytni, hemlun í bleytu og hávaða.
Sparneytni – minna vegviðnám 
- Sterkust og veikust: A til G - sparar allt að fimm fulla eldsneytistanka á endingartíma dekkjanna*
- Samliggjandi flokkar: B og C - sparar 0,1 l/100 km*
Vegviðnám hjólbarða hefur áhrif á eldsneytisnotkun, endingartíma og losun koltvísýrings vegna slits á dekkjum. Vegviðnám er 20% af eldsneytisnotkun bílsins. Þeim mun minna vegviðnám, því minni eldsneytisnotkun.
Munurinn á eldsneytisnotkun milli flokkanna (A-G) er umtalsverður, eða um 0,6 l/100 km. Þau dekk sem hafa minna vegviðnám eru einnig með 14g/km lægri útblástur á koltvísýringi. Á endingartíma dekkjanna er munurinn á eldsneytisnotkun því fimm fullir eldsneytistankar (240 lítrar).
Veggrip í bleytu – aukið öryggi 
Sterkasti og veikasti flokkur: A til F - Hemlunarvegalengd meira en 18 metrum styttri*
- Samliggjandi flokkar: B og C - Hemlunarvegalengd styttri sem samsvarar einni bíllengd*
Fyrir sumardekk er grip í bleytu sérstaklega mikilvægt þegar kemur að öryggi. Hjólbarðar með mjög góðu veggripi hafa styttri hemlunarvegalengd, þeir rása minna og gera stjórn ökutækis auðveldari. Merkingin gefur til kynna hemlunarvegalengd dekksins á blautu malbiki á 80 km/klst. Sem dæmi getur munurinn á hemlunarvegalengd á milli flokks A og F verið 18 metrar, u.þ.b. fjórar bíllengdir.
Veghljóð – hljóðstyrkur 
- 3 svartar hljóðbylgjur = Fer yfir fyrirhuguð leyfileg mörk ESB (75 dB)
- 2 svartar hljóðbylgjur = Samsvarar fyrirhuguðum leyfilegum mörkum ESB (72dB)
- 1 svört hljóðbylgja = Meira en 3 dB minni hljóðstyrkur en fyrirhugaðar reglugerðir ESB kveða á um (69 dB eða minna)
Gildið fyrir veghljóð gefur til kynna þá hljóðmengun sem dekkin valda. Það veghljóð sem ökumenn sjálfir heyra er ekki tekið með í reikninginn. Auk veghljóðs, sem mælt er í desíbelum (dB), þarf merking að vera ein til þrjár svartar hljóðbylgjur í samræmi við tilskipun ESB sem tekur gildi í nóvember 2012.
M.v. 7l/100 km eldsneytisnotkun. Áætlaður árlegur akstur 15,000 km og að dekk endist 40,000 km. Þessi gildi eru mæld út frá prófunum EC/1222/2009.
*Í ESB-tilskipuninni um dekk er bæði sparneytni og veggrip í bleytu sett í flokk A-G. Flokkur D er ekki notaður í tengslum við sparneytni og fyrir veggrip í bleytu eru flokkar D og G ekki notaðir.
