Olíuskipti
Hvenær á að skipta um olíu?
Algeng krafa bílaframleiðenda er að fylgt sé lágmarks þjónustuáætlun um olíuskipti samkvæmt þjónustubók bílsins. Þessar lágmarkskröfur eru oftast þær að olíuskipti þurfi að fara fram einu sinni á ári eða á 15.000-20.000 km fresti, hvort sem kemur á undan. Fyrir þá bíla sem þurfa „synthetic“ eða „longlife“ olíur er lágmarkstíðni olíuskipta oftast einu sinni á ári eða á 30.000 km fresti, hvort sem kemur á undan.
Ljós í mælaborði og olíuskynjarar
Í bílum sem eru búnir skynvæddum olíuskynjara (Intelligent Oil Life Monitor) skal fylgjast með ljósi í mælaborði og skipta um olíu samkvæmt því. Athugið að hér er ekki átt við venjulegt „þjónustuljós“ sem eingöngu eru stillt á tímabil eða ákveðinn kílómetrafjölda, heldur leggur skynvæddi olíuskynjarinn mat á raunverulegt ástand olíunnar og gefur til kynna hvenær skipta þarf um smurolíu.
Aðstæður hafa áhrif á tíðni olíuskipta
Allar tölur sem gefnar eru upp, t.d. frá bílaframleiðendum, eru viðmið um olíuskipti sem eiga við bestu mögulegu aðstæður. Reynsla okkar hefur sýnt að við íslenskar aðstæður – sem einkennist af stuttum vegalengdum, rysjóttu veðurfari, ryki, ösku og miklum heitasveiflum – sé ráðlegra að helminga þennan tíma. Margir framleiðendur mæla einmitt með því í þjónustubókum sínum að við erfiðar aðstæður sem þessar eigi að auka tíðni olíuskipta.
Af þessum sökum mælir MAX1 með því
- að olíuskipti á venjulegum bílum fari fram á sex mánaða fresti eða eftir helming þess kílómetrafjölda sem framleiðandi tilgreinir, hvort sem kemur á undan
- að í bílum sem eiga að nota „synthetic“ eða „longlife“ smurolíur skuli tíðni olíuskipta vera einu sinni á ári eða eftir 20.000 km akstur, hvort sem kemur á undan
- að þá bíla sem búnir eru skynvæddum olíuskynjara skuli þjónusta þegar gaumljós skynjarans kviknar í mælaborði.
Að sjálfsögðu er það alltaf ákvörðun bíleigandans hversu oft hann skiptir um smurolíu á sínum bíl.
Magn smurolíu á vél
Vakin er sérstök athygli á því að mikilvægt er að fylgjast vel með magni smurolíu á vélinni, mæla magnið reglulega á milli olíuskipta og fylla á ef mæling sýnir að olíu vanti á bílinn. Í handbók bílsins er hægt að sjá hversu mikið magn smurolíu skal vera á vélinni.
Hafðu samband við starfsmenn MAX1 Bílavaktarinnar og fáðu upplýsingar um hvenær þú átt að skipta um olíu á bílnum þínum.
